Қазақстан Ұлттық Банкі сарапшылар қауымдастығы арасында жүргізілген кезекті макроэкономикалық сауалнаманың нәтижесін жариялады.

Сарапшылар Brent маркалы мұнай бағасы, Қазақстан экономикасының өсуі, инфляция, базалық мөлшерлеме, тауарлар мен қызметтердің экспорты және импорты, сондай-ақ теңге бағамы бойынша болжамдарын ұсынды.

Мұнай бағасы мен экономиканың өсуі

Мұнай бағасына қатысты сценарийлік шарттар бүкіл болжамды кезеңде жоғары қарай қайта қаралды: 2026 жылға Brent маркалы мұнай бағасы бойынша күтулер барреліне 82,7 АҚШ долларынан 88,4 АҚШ долларына дейін, 2027 жылға – 75 АҚШ долларынан 80 АҚШ долларына дейін, 2028 жылға – 73,7 АҚШ долларынан 75 АҚШ долларына дейін көтерілді.

Қазақстан экономикасының өсуіне қатысты болжамдар айтарлықтай өзгерген жоқ. ЖІӨ өсімі 2026 жылы 4,8%, 2027 жылы – 4,7% (бұған дейін – 4,6%), 2028 жылы – 4,4% (бұған дейін – 4,3%) деңгейінде күтіледі.

Инфляция мен базалық мөлшерлеме

Сарапшылардың инфляция бойынша болжамдары бүкіл болжамды кезеңде төмендеді: 2026 жылға – 10%-дан 9,5%-ға дейін, 2027 жылға – 8,5%-дан 8,3%-ға дейін, 2028 жылға – 7%-дан 6,9%-ға дейін.

2026 жылға арналған базалық мөлшерлеме бойынша күтулер медианасы 15,9% құрады (бұған дейін – 16,0%). 2027 жылғы болжам 13%-дан 13,3%-ға дейін, 2028 жылғы болжам 10,5%-дан 11,5%-ға дейін өсті.

Сауалнамаға қатысушылардың құрамы туралы

Сауалнамаға Қазақстанның макроэкономикалық көрсеткіштерін талдаумен және болжаумен айналысатын 14 ұйым қатысты. Респонденттер қатарына нарықтың кәсіби қатысушылары, зерттеу институттары, халықаралық ұйымдар, сондай-ақ рейтингтік агенттіктер кіреді.

Айта кетейік, макроэкономикалық сауалнамада Ұлттық Банктің болжамдары қамтылмайды. Сауалнама нәтижесі нарықтың кәсіби қатысушыларының тәуелсіз пікірлерін, бағалаулары мен күтулерін көрсетеді.

Толығырақ – Қазақстан Ұлттық Банкінің интернет-ресурсында

Толығырақ ақпаратты БАҚ өкілдері мына телефон арқылы ала алады: 
+7 (7172) 77–52–10 
e-mail: press@nationalbank.kz
www.nationalbank.kz