Қазақстандықтар күн сайын цифрлық банкинг арқылы 21,3 миллионнан астам операция жүргізеді

Қазақстанның төлем карточкалары нарығы өсу динамикасын көрсетіп келеді. 2023 жылдың 1-жартыжылдығында Қазақстан банктері шығарған төлем карточкаларымен 73,5 трлн теңгеге 5,4 млрд операция жүргізілді.

Қолма-қол ақшасыз операциялардың да көлемі өскені байқалады. 2023 жылдың 1-жартыжылдығында жеке тұлғалар Қазақстан эмитенттерінің төлем карточкаларымен қолма-қол ақшасыз 62,8 трлн теңгеге 5,3 млрд операция жүргізді. Бұл 2022 жылғы көрсеткіштен 1,4 есе артық.

Қолма-қол ақшаны шешіп алу операцияларының саны 2022 жылғы осы кезеңмен салыстырғанда 7,6%-ға азайды.  

Қолма-қол ақшасыз операциялар жүргізуде интернет-банкинг пен мобильді-банкинг – қазақстандықтар арасында өте жоғары сұранысқа ие тәсіл. Қолма-қол ақшасыз он операцияның тоғызы онлайн режимде жүзеге асырылады.

2023 жылдың 1-жартыжылдығында қолма-қол ақшасыз операциялардың жалпы құрылымындағы онлайн операциялардың үлесі – саны жағынан 73,5%, ал көлемі жағынан 85,8% болды. Күн сайын цифрлық банкинг арқылы орта есеппен 297,7 млрд  теңгеден астам сомаға 21,3 миллионнан көп операция жүргізіледі.

2023 жылғы 1 шілдедегі деректер бойынша, белсенді төлем карточкаларының жалпы саны – 36,4 млн бірлік (2022 жылғы маусым айымен салыстырғанда 20,4%-ға көп).

Тауарлар мен қызметтерге ақы төлеу инфрақұрылымы едәуір кеңейді. Төлеуге төлем карточкаларын қабылдайтын сауда кәсіпорындарының саны 1,8 есе өсті (2023 жылғы маусым айында – 702 482 кәсіпорын).

Кәсіпкерлердегі және банктердегі POS-терминалдардың саны 1,4 есе өсіп, 934,1 мың бірлікке жетті. Нарықтағы 90,7% POS-терминал QR-кодты пайдалану арқылы төлем жасау функциясын қолдайды.

Толығырақ ақпаратты БАҚ өкілдері мына телефон арқылы ала алады:
8 (7172) 77–52–10
e-mail: press@nationalbank.kz
www.nationalbank.kz